(اُردو ایکسپریس) کراچی بار ایسوسی ایشن کے تحت آل پاکستان وکلا کنونشن میں وکلا برادری نے چھبیسویں مجوزہ آئینی ترمیم کیخلاف ملک گیر تحریک چلانے کا اعلان کردیا۔
وکلا کنونشن میں ملک بھر کی بار کونسلز اور بار ایسوسی ایشنز کے نمائندے شریک ہوئے اور مجوزہ آئینی ترمیم پر شدید تحفظات کا اظہار کیا۔کنونشن سے خطاب کرتے ہوئے سابق صدر سپریم کورٹ بار منیر اے ملک نے مجوزہ ترمیم کو عدلیہ کی آزادی پر وار قرار دیتے ہوئے کہا کہ جو لوگ آج اس کی حمایت کر رہے ہیں، کل یہ ترمیم اُن ہی کیخلاف استعمال ہوگی۔سینیئر وکیل حامد خان نے کہا کہ عمارت میں نقص ہو تو اُسے ٹھیک کیا جاتا ہے، نہ کہ عمارت ہی گرادی جائے۔کنونشن میں مطالبہ کیا گیا کہ پارلیمانی کمیٹی مسودہ پیش کرنے سے پہلے تمام بار ایسوسی ایشن کو بھیجے اور مشاورت کرے۔کنونشن سے سابق صدر سپریم کورٹ بار علی احمد کرد، صدر کراچی بار عامر نواز وڑائچ اور دیگر وکلا نے بھی خطاب کیا۔
