انٹرنیٹ میں خلل: پی ٹی آئی جلسہ کی وجہ سے فائر وال پھر لگ گئی ؟

لاہور:( اُردو ایکسپریس) پاکستان بھر میں واٹس ایپ اور انسٹاگرام صارفین کی ایپلی کیشن بندش کی شکایات سامنے آگئیں،جس روز لاہور میں پی ٹی آئی کا جلسہ تھا اس دن انٹرنیٹ میں ایک بار پھر خلل دیکھنے کو ملا ، صارفین کو واٹس ایپ پر وائس میسجز ، تصاویر بھیجنے اور دیکھنے میں دشواری کا سامنا کرنا پڑا۔تفصیلات کے مطابق رات گئے نجی موبائل فون کمپنی اور پاکستان ٹیلی کمیونیکیشن لمیٹڈ (پی ٹی سی ایل) کی جانب سے فراہم کردہ انٹرنیٹ سروسز میں بھی خلل کی بھی اطلاعات سامنے آئیں۔ملک میں انٹرنیٹ بندش سے متعلق ویب سائٹ ڈان ڈیٹیکٹر کے مطابق انسٹاگرام صارفین نے آج ایک گھنٹے کے دوران بندش کی تقریباً 86 اطلاعات رپورٹ ، واٹس ایپ صارفین کی صبح 10 بج کر 45 منٹ سے مسائل کی نشاندہی، وائس نوٹ بھیجنے میں مشکلات دیکھنے میں آئیں ۔ڈان ڈیٹیکٹر نے مزید کہا کہ نیٹ ورک فراہم کرنے والے زونگ اور پی ٹی سی ایل نے بھی صبح سے سروسز میں خلل کی اطلاع دی ہے۔دوسری جانب پاکستان ٹیلی کمیونیکیشن اتھارٹی (پی ٹی اے) کی جانب سے اس معاملے پر کسی قسم کا تبصرہ نہیں کیا گیا۔صارفین تبصرے کرتے ہوئے دکھائی دے رہے ہیں کہ انٹرنیٹ میں خلل پی ٹی آئی لاہور جلسہ کی وجہ آیا ہے ، حکومت عوام کی آواز دبانا چاہتی ہے۔ انٹرنیٹ میں خلل کی وجہ سے اونلاین پلیٹ فارمز پر کام کرنے والے افراد کے لیے دشواریاں پیدا ہو رہی ہیں ۔